നിനക്ക് സുഖം തന്നെ അല്ലെ?
നിനക്ക് സുഖം തന്നെ അല്ലെ?
നിനക്ക് പഴയ പുഞ്ചിരികളും സ്വപ്നങ്ങളും
തിരിച്ചു കിട്ടിയില്ലേ?
നിന്റെ പ്രഭാതങ്ങളില്‍ മരച്ചില്ലകളില്‍ നിന്ന്
കിളികള്‍ ചിലയ്ക്കാ റില്ലേ?
നിന്റെ മധ്യാഹ്നങ്ങളെ മാമ്പഴം മണക്കുന്ന
കാറ്റ് വന്നു തലോടി ഒരു ഉച്ച മയക്കത്തിലേയ്ക്കു
കൂട്ടിക്കൊണ്ടു പോകാറില്ലേ?
നിന്റെ സന്ധ്യകളില്‍ കുളികഴിഞ്ഞെത്തിയ
ഹരിനാമ കീര്‍ത്തനങ്ങള്‍ ചൊടികളില്‍
മുടിയുണക്കാറില്ലേ?
നിനക്ക് സുഖം തന്നെ അല്ലെ?
***
കത്തുകള്‍ എഴുതാന്‍ എനിക്ക് മടിയാണ് എന്ന്
നിന്റെ പരിഭവങ്ങള്‍ കേട്ട്
മഷി വിതുമ്പുന്ന ഒരു പ്രവാസിയുടെ
മനസ്സിലേയ്ക്ക്
അക്ഷരങ്ങള്‍ തെന്നി വീഴുമ്പോള്‍
കടലുകള്‍ക്കപ്പുറത്ത്
കാഴ്ച്ചകള്‍ക്കപ്പുറത്ത്
നിന്റെ കാതുകളിലേയ്ക്ക്‌
ഒരു മധുര സന്ദേശം
ചിറകുകള്‍ വിടര്‍ത്തി പറക്കാന്‍
ഒരുങ്ങുകയാണ്.
നിനക്ക് സുഖം തന്നെ അല്ലെ?
No comments:
Post a Comment